黄嘉乐新剧同杨明“Hehe”：惊女朋友呷醋

江嘉敏、黄嘉乐、林秀怡、吴沚默等昨日（29日）现身将军澳电视城为明珠台《好医生》第三季造势，众人以实习医生造型登场。

黄嘉乐被问到曾参演《白色强人》的黄嘉乐，可有份演出《白色强人2》？他指暂未清楚，不过就经已开拍新剧《我家无难事》：“今朝早拍咗第一场，剧入面同杨明最多对手戏，仲同佢疑似‘Hehe’，都几得意。”问到早前涉交通意外的杨明状态如何？他指对方好精灵：“今朝就系同佢拍分手场口。（佢揸车返工？）咁我又唔见。（会唔会车埋佢走？）我迟过佢走呀，如果佢需要嘅都可以。（佢好有需要。）佢有宝贝（庄思明）啦！”

问到两男可有亲热戏？他拒剧透：“保留吓，等你哋自己睇。（怕唔怕庄思明呷醋？）我惊女朋友呷醋多啲，庄思明佢好大方，一定冇问题嘅。（之前话佢监场。）乱讲嘢啲人。”

至于林秀怡表示已有半年冇返电视城，最近忙于处理美容院开张事宜：“冇人搵我做嘢。（有冇剧拍？）等公司安排，任何角色我都会努力做！（想做医生？）梗系想，做咗护士十几年都冇得‘升职’，每次都系喺班医生后过镜，都想讲吓啲专有名词，感觉Pro啲，唔系净系讲啲问候对白。”

当中曾于《白色强人》中饰演脑神经外科顾问的黄嘉乐，于影相期间跟江嘉敏开玩笑，嘲笑对方：“你要畀我医，因为你冇脑。”笑翻全场！

江嘉敏活动后受访，讲到被说“冇脑”，她笑言：“唔敢顶前辈嘴，佢做过我3次男朋友，已经好鬼熟，所以开玩笑系OK，如果唔系我都打佢。（开玩笑嘅底线？）我都几玩得?，熟嘅话都OK，但涉及身边啲朋友同屋企人就唔OK。”

首次穿上医生袍的她，自言相当恨演医生角色：“可能我入行年资浅，做开都系啲女朋友、妹妹嘅角色，但其实我嘅梦想系成为医生，奈何成绩唔允许，读到都惊医死人，惟有喺戏剧上满足。”提起她于台上说想做手术医生，为病人开刀，她笑说之前有相关“经验”：“读书有劏过牛眼、青蛙。（唔惊血？）唔惊人哋嘅血，但惊自己嘅血，细个因为鼻膜好薄，成日流鼻血入医院，系资深病人。”

讲到她日前出Post宣布退演新剧《金宵大厦2》，江嘉敏解释因为难就两剧档期：“依家都未拍完《七公主》，《金2》9月头就要开拍，之前都试过两剧叠住拍一个星期，但今次沟通过唔得，就连短发造型都试埋，所以接唔到都好失望。（真系要你剪短OK？）光头都得！睇咗剧本，呢个角色好有发挥空间。（边位演员顶上？）呢个就唔清楚。”

网民调侃道：“黄嘉乐同杨明Hehe，估计庄思明又要打烂醋呈，日日到片场贴身监视。”

转自看港剧